+389 78 385 571 info@lgbtunited.org

Ko mlo vakti, kana arakhava sine korkori man thaj realizirinava sine man ko but umala, ma te vakerav – kana bajrovava sine sar sa e ,,normalno,, šukar ikerava me gogjate kaj gej/lezbejka sine doboro dur, fiktivno thaj bitolerantno buti. Duri vi korkori mange. Thaj šaj numa te gindine so amen e LGBT ko javera manušengere jakha.

Kan haliljum kaj mangava personen mle jeriestar – džuvlja, thaj kana ka anav me gogjaten o moment kana avgofare ko mlo dživdipe zamagljum jekha čhaja, akana astarela ma asaiba, numa ko adava vakti adava hošipe vazdingja bari panika ko mlo šero. Totalno haosi, save so akana mangava te vakerav tumenge.

Avela me gogjate jekh scena kote so khetane mle avgune džuvljasar kola so but mangava sine, bešaja ki jekh bešavni karši o Hoteli KArpoš, thaj ko mlo vogi ujrana sine e paparuge. Vakerava sine korkori mange: „Mangava ola. Amma so si mancar? Nane šukar akava. Nane normalno. Na džala akava. Našti, tu sijan džuvli thaj voj da si džuvli. Sar ka vakerav mle amalkenge kaj isi man phiravni?“ Normalno, but tumendar nakhle akava thaj šukar džanena baši so kerava lafi.

Te mange adale/adala so mangesa ko akala da divesa, thaj ma te ove došakerdo trujalipastav si čačuni bari baht. Te našti te čhumine tle manglja kana ka dikhen tumen, nane lokho. Vi adava so bariljum ki but lačhi familija, sine olenge pharo te haljoven man, sine konzervativno pali akava phučibe.

Panda sar tikni šunava sine kobor e bijava si šukar thaj lačhi buti. Te bajrove, te ovel tut rom thaj čhave adava si diso so mangeja te dorese. Asavke lafija-muabetija dži doboro šaj te limitirinen tut thaj te keren korkori tut ma te hošine tut thaj te phuče tut so mangeja. Kerena tuke konfuzija, ačhavena tut thaj bucinena tut tele.

Baši adava soske isi man phiravni jekh  vakti sijum sine paldimi kherestar, našavgjum jekh baro mangipe soske mangava sine te ovav adava so sijum. Numa na dureder. Čhavalen čhajalen, te manga amen si diso majšukar ko sumnal.

Dadalen, dajalen, den šajipe e čhavenge te oven adava so si, ma preiranen olen ko diso so na mangena te oven. Te bajroven lošale thaj saste khamela pes num ate džan pali o drom so korkore arakhle thaj te džanel pes kaj te ove gej si OK. Sa si šukar kana avela vilestar thaj vuže hošipastar.

 

Avtori: Ktb

E gindipa so si vakerde akate si e avtorengere thaj na sikavena o stavija so isi e MCMS thaj e Europakere Unijatar

 I programa Lačho dizutnengoro sasoitnipe: raštralutno finansiribe e civilno organizacijen  realizirinela e Makedonijakoro centari baši maškarthemutni kooperacija (MCMS), Balkaneskiri drakhin baši civilno sasoitnipaskoro buhljaribe (BCSDN) thaj o Centari baši informiribe, kooperacija thaj civilno organizacijengoro buhljaribe Slovenijatar (CNVOS)“

 

„O proekti si finansirimo Europakere Unijatar“