+389 78 385 571 info@lgbtunited.org

Kana but lungeste mareja tut korkoro mamuj tle demonija, na deja korkori tuke ni te rode arka/dumo ni kana džaneja kaj but khamela pes tuke… Mangeja neko te te avel thaj te dolel tut tle pikestar thaj te phenetuke: Sa si šukar, džanava kaj si tuke but phareste… Thaj čače te phenav, ni tu na deja korkori tuke tea stare tlo ruhi kotar I bari dukh… E manuša nakhena, dikhena tut asavdi, lošali, funkcionalno, džikote andral korkori haja tut thaj na džaneja soske hošineja tut doborom nafela/bilačhe, vi adava so nane soske te hošine tut agjare… Kana but lungeste mareja tut korkori tle demonencar, isi jekh tikno kotor tutar so džanela kaj sa akala hošipa kotar bisostar, bienergijaki, sovavutni, fizikano destruktiviteti, bari dukh thaj bilačhipe… ka nakhel… Sa ka nakhel, a adava o demoni kotar jekh rig tle pikhestar ka kerel te bistre sa so  šukar thaj lačhipe kergjan baši o sumnal thaj ka bucinel tut palem ki adija šokali hev kotar I dukh thaj hovavne manušengere asaviba anglal e javera manuša… Ka dživdine, ka adžikere, ka dodžakere te nakhel sar so kergja pes o nakhlo drom thaj angli leste o nakhlo drom… Ka nakhel I party pali I buti, o bijando dive ka nakhel bizi tute, e familijakoro habe ka nakhel bizi tute… Ka nakhel tlo dživdipe bitiro. Thaj sakana kana vareko ka mangel te astarel tut, ka hute, ka vakere vareko upri tute čhorgja kikav tate panjesar… Sostar džaneja kaj ka ikljove ki rig e fizikane dukhasar so legareja, numa adale “khovlipasar” anglal e javera… Na. Odolesar našti te ikljove ko agor, soske sikliljan lungo vakti te mare tu korkori tusar, te kere buti mamuj tute, ten a de korkori tuke te rošane, numa kotar I dar kaj akava drom nane te ove lačhi. A doborom “sar akava drom ” isi tut majhari 10 paramisa thaj misala/egzamplija, numa našti te pakja korkori tuke ma te šokakere tut… Sakova dive pheneja tuke “ake kotar avdive ka astarav ” thaj džikote pašljoveja thaj phandeja te jakha, ka kere 100 planija baši adava sar te khuljare adava “ake kotar avdive ka aka astarav “. Thaj palem ka arakhe uteha ko adava so si tuke uteha beršencar palpale bizi varesavo hošipe thaj šukaripe, vi ka haljove kaj nisoske hardžingjan mini barvalipe baši diso so na trebno tuke thaj baši o habe so nane te ha, numa kineja ole sar nesavo “siguriteti” te arakhel pesko phare momentija, a ni hala pes tuke, ni pijela pes tuke… Numa ko ruhu si tuke phareste, dukhala to kolin kana leja solufi thaj dureder džaja te mare tut korkore tle demonencar, dobolom lungeste te kere korkori te gindine kaj 20 arija suno ka resen tuke sa akava te nakhel thaj te chide panda jekhvar ko nevo dive, adale sizifeskere baresar, legarindoj vi e bare vi korkori tut dži ki buti, dži ko phiravibe, dži ko mangipe, dži ki mangin te korkori te kere diso… Vi jekhvar thaj vi jekhvar ki enjatoni rota kotar o dženemi…

 

Avtori: Demetra

E gindipa so si vakerde akate si e avtorengere thaj na sikavena o stavija so isi e MCMS thaj e Europakere Unijatar

 I programa Lačho dizutnengoro sasoitnipe: raštralutno finansiribe e civilno organizacijen  realizirinela e Makedonijakoro centari baši maškarthemutni kooperacija (MCMS), Balkaneskiri drakhin baši civilno sasoitnipaskoro buhljaribe (BCSDN) thaj o Centari baši informiribe, kooperacija thaj civilno organizacijengoro buhljaribe Slovenijatar (CNVOS)“

 

„O proekti si finansirimo Europakere Unijatar“